Oct 09 2026 | २०८३, आश्विन २३ गते
.jpg)
Oct 09 2026 | २०८३, आश्विन २३ गते
विराटनगर : कोसी प्रदेश प्रहरीले विद्युत् ट्रान्सफर्मर चोरीमा संलग्न १२ जनालाई सार्वजनिक गरेको छ। चोरीमा प्रत्यक्ष संलग्न ७ जना र चोरीको सामग्री किनमेल गर्ने ५ जना व्यापारीलाई पक्राउ गरिएको प्रहरीले मंगलबार पत्रकार सम्मेलनमार्फत जानकारी दिएको हो।
मोरङ, सुनसरी र झापाका विभिन्न स्थानबाट ट्रान्सफर्मर चोरी भइरहेको सूचनाका आधारमा प्रदेश प्रहरी कार्यालयले विशेष निगरानी र ‘स्टिङ अपरेसन’ सञ्चालन गरेको थियो। अनुसन्धानका क्रममा सिसिटिभी फुटेज विश्लेषण, शङ्कास्पद स्थानमा खानतलासी, तामा फ्याक्ट्री र भाँडा पसलमा निगरानीसमेत बढाइएको थियो।
प्रहरी नायव महानिरीक्षक (डीआईजी) ईश्वर कार्कीको नेतृत्वमा आयोजित पत्रकार सम्मेलनमा पक्राउ परेकाहरूको विवरण सार्वजनिक गरिएको हो। पक्राउ परेका व्यक्तिहरूमा मोरङको ग्रामथान, बेलबारी र सुनसरीको दुहबी क्षेत्रका स्थानीय युवा रहेका छन् भने एक जना भारतका नागरिकसमेत रहेका छन्। चोरीको सामग्री किन्ने व्यापारीहरू विराटनगर, दुहबी र इटहरीबाट पक्राउ परेका हुन्।
प्रहरीले उनीहरूको साथबाट ३७० किलोग्राम तामाको तार, चोरीमा प्रयोग भएका औजारहरू, पाँच थान मोटरसाइकल, एक थान पिकअप गाडी र १२ थान मोबाइल फोन बरामद गरेको छ। बरामद अन्य सामग्रीमा डायल रेन्च, सलाई रेन्च, पिलास, ह्याक्सो, छिनो, झम्पल र इलेक्ट्रिक ग्राइन्डरजस्ता उपकरणहरू छन्।
अनुसन्धानका क्रममा पक्राउ परेकाहरूले मोरङबाट ८, सुनसरीबाट १२ र झापाबाट २ वटा गरी जम्मा २२ वटा ट्रान्सफर्मर चोरी गरेको स्वीकारेका छन्।
प्रहरीले यस गिरोहलाई स्थानीय पूर्वाधारमा नोक्सानी पुर्याउने गम्भीर आपराधिक गतिविधिमा संलग्न रहेको भन्दै थप अनुसन्धान अघि बढाएको जनाएको छ।
© 2026 All right reserved to thelumbini.com | Site By : Sobij
